Amdanom Ni

Mae Partneriaeth Natur y Fro yn rhan o rwydwaith drwy Gymru gyfan sy'n gweithio i helpu natur yn eu hardaloedd.

Ein gweledigaeth yw Bro sy'n gyfoethocach o ran bywyd gwyllt, lle mae pobl yn parchu ac yn mwynhau'r natur o'u cwmpas.

Ein cenhadaeth yw ailgysylltu pobl o bob rhan o'r sir â natur. Ein nod yw helpu pob agwedd ar gymdeithas i gymryd rhan mewn camau ymarferol dros natur.

Mae gan y bartneriaeth dros 60 o aelodau, gan gynnwys pawb o unigolion i fusnesau. Mae grŵp llywio o gynrychiolwyr o sefydliadau lleol yn arwain ein gwaith.

Rydym i gyd yn gweithio gyda'n gilydd i ddatblygu a chyflawni Cynllun Gweithredu Adfer Natur y Fro.

Natur yn y Fro

Mae’r ddaeareg, y lleoliad arfordirol, a’r gwaith rheoli tir yn y Fro yn creu amrywiaeth gyfoethog o gynefinoedd. Mae hyn yn cynnwys rhai cynefinoedd prin iawn, e.e. y glaswelltiroedd calchog yn Old Castle Down a'r lagŵn heli yn Aberddawan. Ceir rhai rhywogaethau prin hefyd, gan gynnwys:

Britheg Frown

Pibydd Gwyrdd

Blodyn-ymenyn yr Ŷd

Sarth

Berdysyn Gwisgi

Cardwenynen

Ceir rhai cynefinoedd helaeth fel glaswelltiroedd arfordirol, yn ogystal â phocedi bach o natur. Mae hyd gwrychoedd hynafol / llawn rhywogaethau ac ymylon caeau âr hefyd o ddiddordeb.

Dysgwch Mwy

Nature in the Vale

Dyer's Greenweed Vale Nature Partnership

Diogelu Natur yn y Fro

Yn y Fro, mae gennym rwydwaith o safleoedd 'dynodedig' (gwarchodedig). Mae dynodiadau cenedlaethol a rhyngwladol yn cynnwys:

Ardaloedd Cadwraeth Arbennig (ACA)

Ardaloedd Gwarchod Arbennig (AGA)

Safleoedd Ramsar

Safleoedd o Ddiddordeb Gwyddonol Arbennig (SoDdGA).

Dyma 'emau' y rhwydwaith cadwraeth. Mae gennym hefyd warchodfeydd natur a pharciau gwledig.

Y tu hwnt i'n safleoedd gwarchodedig, mae cynefinoedd pwysig eraill yn cyfrannu at iechyd ein natur. Mae gwarchod a chyfoethogi’r cynefinoedd hyn yn rhan annatod o lwyddiant unrhyw gynllun i adfer natur yn y sir yn y dyfodol.

Ardaloedd Gwarchodaeth Arbennig, Ramsar a Chadwraeth Arbennig

Mae'r safleoedd cadwraeth natur pwysicaf a mwyaf arbennig ym Mro Morgannwg yn cynnwys: Aber Afon Hafren, a ddynodir yn Ardal Gwarchodaeth Arbennig (AGA) ac yn safle Ramsar sydd o bwysigrwydd cenedlaethol a rhyngwladol ar gyfer bridio, bwydo, gaeafu a mudo rhywogaethau adar prin ac sy’n agored i niwed. Mae'r cynefinoedd cefnogol, gan gynnwys gwastadeddau llaid rhynglanwol a gwastadeddau tywod, morfeydd heli, graean bras a glannau creigiog hefyd wedi'u diogelu o fewn yr AGA, gan eu bod yn cefnogi'r rhywogaethau adar gwarchodedig. Dynodwyd Bae Dwnrhefn yn Ardal Cadwraeth Arbennig (ACA) am ei boblogaeth nodedig o Dafolen y Traeth (Rumex rupestris) ac fe'i hystyriwyd yn un o'r ardaloedd gorau yn y DU ar gyfer y rhywogaeth hon. Mae Tafolen y Traeth wedi’i cholli o'r fan hon oherwydd erydiad y clogwyni, ond mae hadau wedi’u casglu a'u lluosogi i'w cyflwyno i gynefin addas gerllaw ar glogwyni Bro Morgannwg.

Safleoedd o Ddiddordeb Gwyddonol Arbennig

Mae 27 Safle o Ddiddordeb Gwyddonol Arbennig (SoDdGA) yn y Fro sy'n cynnwys amrywiaeth o gynefinoedd a rhywogaethau o bwysigrwydd cenedlaethol dros 1041 hectar. Maent yn amrywio o ran maint o gaeau bach i rannau helaeth o arfordir y Fro.

Safleoedd o Bwysigrwydd Cadwraeth Natur

Mae Safleoedd o Bwysigrwydd Cadwraeth Natur (SBCNau) (a elwir hefyd yn Safleoedd Bywyd Gwyllt Lleol) yn ardaloedd sy’n llawn bywyd gwyllt. Maent yn cael eu nodi a'u dewis am eu bioamrywiaeth leol. Yn y Fro mae 363 o SBCNau ar hyn o bryd fel Mynydd Rhuthun, Pwll y Mer, Cae Tegeirianau Gwenfô, Y Downs, Afon Tregatwg a Cross Common. Mae polisïau penodol yn y Cynllun Datblygu Lleol sy'n diogelu SBCN rhag gwaith datblygu.

Safleoedd gwarchodedig eraill

Yn y Fro, rydym yn ffodus bod gennym nifer o warchodfeydd sy'n cael eu rheoli gan sefydliadau bywyd gwyllt. Er enghraifft, mae gan Ymddiriedolaeth Bywyd Gwyllt De a Gorllewin Cymru a Coed Cadw warchodfeydd yn y sir. Mae Gwarchodfeydd yr Ymddiriedolaeth Bywyd Gwyllt yn cynnwys Cwm Colhuw, Coed y Bwl, Coed Garnllwyd, Coed Llwyn Rhyddid a Thrwyn Larnog. Mae Gwarchodfeydd Coed Cadw yn cynnwys Coed Worney yn Llyswyrni a Choed Cwm George yn Ninas Powys. Er bod llawer o warchodfeydd natur anffurfiol yn y Fro, dim ond tri o'r rhain sydd wedi'u dynodi'n ffurfiol fel Gwarchodfeydd Natur Lleol (GNLlau) dan Ddeddf Parciau Cenedlaethol a Mynediad i Gefn Gwlad 1949. Y rhain yw Cliffwood ym Mharc Gwledig Porthceri (y GNLl gyntaf yng Nghymru), Cwm Talwg yn y Barri a Pharc Gwledig Llynnoedd Cosmeston, Penarth.

Cynllun Gweithredu Adfer Natur

Sut gallwch chi helpu?